Piscina assai arcolica!

Nna’ ‘stu mumentu staju pinsannu
a cosi strammi e ‘mpussibili a rializzari,
e nun è veru ca tuttu “ha” statu fattu, macari cu’ affannu,
sintiti sintiti, litturi beddi, ‘nzoccu ancora si po’ fari.

Si pensi ca u’ bagnu nnall’acqua è scuntatu,
prova a viriri chiddu ca cumminanu in Giappuni,
in un “centru benesseri ” assai friquintatu,
ca si chiana Yunnessun Resort, propriu nna’ ‘sta naziuni …

‘Sta società, ai crienti ch’addumannanu bagnu,
offri ‘na vasta scerta di liquidi unni scialarisi:
tè virdi, cafè, ciucculata, acqua salata e vinu a’ bisognu,
e chistu pari fussi ‘u meggiu tuccasana tra l’amici pi’ truvarisi.

Vuliti un pienu di relax e saluti:
u’ tè virdi pari pirfettu pi’ pelle e sistema ‘mmunitariu,
mentri u’ vinu teni i musculi giuvani e lisci comu villuti,
e propriu chistu è u’ cchiù famusu e pari anchi sanitariu.

Una granni piscina veni jinchiuta di russu vinu,
accantu, arta 4 metri, ‘na buttigghia ,
e mentri uno si sguazza, po’ sursiggiari accarezzannu l’intestinu,
tracannannu in libirtà senza cuntrolli, comu fussiru ‘in famigghia.

E’ ‘n’idea tarmenti arrinisciuta,
ca sta facennu mila euri e ‘na fiura curaggiusa;
ma, vistu ch’è accussì richiesta e assai piaciuta,
nall’Italia, saprànnu fari ‘a stissa “biniritta” cosa vantaggiusa ?

Taliati: autru chi primavera, stati e atunnu,

‘un vi pari ‘na cosa di n’autru munnu ?