Havi chiossai di sissant’ anni

Vi riurdati:
“ ‘A vecchia ‘nzipita ci acchiana l’acitu,
u’ lignu è frariciu, ‘un serbi cchiù ?…”

Cu’ ‘sti filastrocchi di anni addietru,
anchi rirennu, s’avissiru tanti cosi a ‘nsignarisi,
speci comu ragiunari, priannu macari a san Pietru
e sapiri, pi’ fari beni nna’ pulitica, comu cumpurtarisi .

Quannu ‘na cosa è vecchia un “serbi cchiù”
è ‘nutili tintari d’aggiustari, si jecca,
comu rici ‘a nenia antica, si è fraricia, è a rischiu,
falla nova, custa picca e s’azzecca.

O’ Prisirenti Renzi, sunnu chiari a tutti ‘sti cosi amari,
i “vecchi” du partitu, “ca s’hannu manciatu menza Italia”,
‘un ci faranno fari cchiù nenti, autru chi “ruttamari”…
assittati nno’ “divanu” a 50mila o misi, e “cavuri” com’a calia.

Dalema, Viltroni, Birsanu, arcuni giustu giustu,
prima comunisti e, casu stranu, s’arriccheru,
ora, ca a stentu i comunisti sunnu in Cina, in Europa hannu disgustu,
si dichiararu di sinistra, poi nno’ Pd e ca’ vinceru…

Ma sunnu sempri da’, anchi si ricinu purcarie du guvernu,
poi si scantanu e votanu ‘a fiducia,
spirannu sempri in quarchi suttaguvernu,
tantu si guaragna assai e nun “s’abbrucia” !

Ma allura semu peggiu da “vecchia ‘nzipita” ?
Caru Renzi, o fai piazza pulita o un ti vutamu,
a far proclami semu tutti bravi, m ‘a to’ linea è ‘ncupita,
a parrari si malantrinu, ma poi pi’ nenti “lottamu”.

Nuatri semu “nichi”, fai comu voi, è tua ‘sta faccia,
l’antichi, però, avianu ragiuni,
cunvinciti, ma subitu, ‘un far ‘sta fiuraccia:
su’ lignu è frariciu ‘un servi cchiù e si metti agnuni !

E tu un sarai u’ primu e mancu l’urtimu:
nna ‘sti 60 anni, sai quantu nn’amu vistu a “COTTIMU” ?