Amici litturi carissimi,
tutti ricurdamu ancora cu’ granni scantu,
‘a tragedia di l’urtima guerra e i danni gravissimi:
menzu munnu distruttu e miliuna di genti o’ campusantu.

A parti ‘na generaziuni d’ebrei ammazzati,
cu’ figghi, picciriddi e muggheri,
nne’ campi di stirminiu e lavori furzati,
e dicennu a tutti ch’eranu sulu prigionieri.

Pi’ ‘sti tirischi, ricinu a Roma, “murì ammazzati”,
‘na beffa ‘ncredibili, veramenti culossali,
ca si sappi sulu ora, facennu ristari trasiculati:
‘a bambina da propaganda nazista nun era tirisca univirsali !

‘A foto di ‘sta picciridda “pirfetta ariana”
usata di nazisti comu propaganda,
sintiti, sintiti: era ebrea e ora è anziana !
Maria chi priu, piccatu ch’a punizioni ora è blanda …

A raccuntari ‘a so’ beffa è propriu idda, oggi ottantenni,
Hessy Taft, è di picciridda ‘a so’ fotu,
ch’era stata scerta du ministru Goebbels, pi’ “fatti esterni”,
a rapprisintari ‘a biddizza di ‘sta razza “visigotu”.

Oggi, cu’ tristizza e rassegnazioni, ‘sta signura dici:
“finarmenti pozzu ririri, si l’avissiru scupertu prima,
nun serei cchiù viva, m’avissiru ammazzata i “giurici”,
senza mancu virsari ‘na lacrima …

Tuttu cominciò pi’ casu, un fotografu,
senza mancu avvisari i ginituri di Hessy,
mannò ‘a foto da piccina a un cuncursu,
vuleva ridiculizzari i nazisti e cci rinisciu cu’ Hessy !

Armenu, ‘sta bedda “facciuzza”
si sarvò da’ delirante operazioni “tagghiuzza”,
avissi, comu l’autri, murutu di fami e di stenti,
alla faccia di gerarchi tirischi assatanati e ‘ndifferenti …